تنگ آ چکے ہیں کشمکش زندگی سے ہم

تنگ آ چکے ہیں کشمکش زندگی سے ہم

ٹھکرا نہ دیں جہاں کو کہیں بے دلی سے ہم

مایوسئ مآل محبت نہ پوچھیے

اپنوں سے پیش آئے ہیں بیگانگی سے ہم

لو آج ہم نے توڑ دیا رشتۂ امید

لو اب کبھی گلہ نہ کریں گے کسی سے ہم

ابھریں گے ایک بار ابھی دل کے ولولے

گو دب گئے ہیں بار غم زندگی سے ہم

گر زندگی میں مل گئے پھر اتفاق سے

پوچھیں گے اپنا حال تری بے بسی سے ہم

اللہ رے فریب مشیت کہ آج تک

دنیا کے ظلم سہتے رہے خامشی سے ہم

tang a chuke hain kashmakash-e-zindagi se ham

thukra na den jahan ko kahin be dili se ham

mayusi-e-maal-e-mohabbat na puchhiye

apnon se pesh ae hain beganagi se ham

lo aj ham ne tor diya rishta-e-umid

lo ab kabhi gila na karenge kisi se ham

ubhrenge ek bar abhi dil ke walwale

go dab gae hain bar-e-gham-e-zindagi se ham

gar zindagi mein mil gae phir ittifaq se

puchhenge apna hal tiri be basi se ham

allah re fareb-e-mashiyyat ke aj tak

duniya ke zulm sahte rahe khamushi se ham