تمہارے نام پر میں نے ہر آفت سر پہ رکھی تھی

تمہارے نام پر میں نے ہر آفت سر پہ رکھی تھی

نظر شعلوں پہ رکھی تھی زباں پتھر پہ رکھی تھی

ہمارے خواب تو شہروں کی سڑکوں پر بھٹکتے تھے

تمہاری یاد تھی جو رات بھر بستر پہ رکھی تھی

میں اپنا عزم لے کر منزلوں کی سمت نکلا تھا

مشقت ہاتھ پہ رکھی تھی قسمت گھر پہ رکھی تھی

انہیں سانسوں کے چکر نے ہمیں وہ دن دکھائے تھے

ہمارے پاؤں کی مٹی ہمارے سر پہ رکھی تھی

سحر تک تم جو آ جاتے تو منظر دیکھ سکتے تھے

دیے پلکوں پہ رکھے تھے شکن بستر پہ رکھی تھی

tumhare nam par main ne har afat sar pe rakhi thi

nazar sholon pe rakhi thi zaban patthar pe rakhi thi

hamare khwab to shahron ki sarkon par bhatakte the

tumhari yad thi jo rat bhar bistar pe rakhi thi

main apna azm le kar manzilon ki samt nikla tha

mashaqqat hath pe rakhi thi qismat ghar pe rakhi thi

unhen sanson ke chakkar ne hamen wo din dikhae the

hamare paon ki mitti hamare sar pe rakhi thi

sahar tak tum jo a jate to manzar dekh sakte the

diye palkon pe rakhe the shikan bistar pe rakhi thi