اندھیرے چاروں طرف سائیں سائیں کرنے لگے

اندھیرے چاروں طرف سائیں سائیں کرنے لگے

چراغ ہاتھ اٹھا کر دعائیں کرنے لگے

ترقی کر گئے بیماریوں کے سوداگر

یہ سب مریض ہیں جو اب دوائیں کرنے لگے

لہو لہان پڑا تھا زمیں پر اک سورج

پرندے اپنے پروں سے ہوائیں کرنے لگے

زمیں پر آ گئے آنکھوں سے ٹوٹ کر آنسو

بری خبر ہے فرشتے خطائیں کرنے لگے

جھلس رہے ہیں یہاں چھاؤں بانٹنے والے

وہ دھوپ ہے کہ شجر التجائیں کرنے لگے

عجیب رنگ تھا مجلس کا خوب محفل تھی

سفید پوش اٹھے کائیں کائیں کرنے لگے

andhere charon taraf saen saen karne lage

charagh hath utha kar duaen karne lage

taraqqi kar gae bimariyon ke saudagar

ye sab mariz hain jo ab dawaen karne lage

lahu luhan para tha zamin par ik suraj

parinde apne paron se hawaen karne lage

zamin par a gae ankhon se tut kar ansu

buri khabar hai farishte khataen karne lage

jhulas rahe hain yahan chhaon bantne wale

wo dhup hai ke shajar iltijaen karne lage

ajib rang tha majlis ka khub mahfil thi

safed posh uthe kaen kaen karne lage