میں لاکھ کہہ دوں کہ آکاش ہوں زمیں ہوں میں

میں لاکھ کہہ دوں کہ آکاش ہوں زمیں ہوں میں

مگر اسے تو خبر ہے کہ کچھ نہیں ہوں میں

عجیب لوگ ہیں میری تلاش میں مجھ کو

وہاں پہ ڈھونڈ رہے ہیں جہاں نہیں ہوں میں

میں آئنوں سے تو مایوس لوٹ آیا تھا

مگر کسی نے بتایا بہت حسیں ہوں میں

وہ ذرے ذرے میں موجود ہے مگر میں بھی

کہیں کہیں ہوں کہاں ہوں کہیں نہیں ہوں میں

وہ اک کتاب جو منسوب تیرے نام سے ہے

اسی کتاب کے اندر کہیں کہیں ہوں میں

ستارو آؤ مری راہ میں بکھر جاؤ

یہ میرا حکم ہے حالانکہ کچھ نہیں ہوں میں

یہیں حسین بھی گزرے یہیں یزید بھی تھا

ہزار رنگ میں ڈوبی ہوئی زمیں ہوں میں

یہ بوڑھی قبریں تمہیں کچھ نہیں بتائیں گی

مجھے تلاش کرو دوستو یہیں ہوں میں

main lakh kah dun ke akash hun zamin hun main

magar use to khabar hai ke kuchh nahin hun main

ajib log hain meri talash mein mujh ko

wahan pe dhund rahe hain jahan nahin hun main

main ainon se to mayus laut aya tha

magar kisi ne bataya bahut hasin hun main

wo zarre zarre mein maujud hai magar main bhi

kahin kahin hun kahan hun kahin nahin hun main

wo ik kitab jo mansub tere nam se hai

isi kitab ke andar kahin kahin hun main

sitaro ao miri rah mein bikhar jao

ye mera hukm hai halanke kuchh nahin hun main

yahin hasin bhi guzre yahin yazid bhi tha

hazar rang mein dubi hui zamin hun main

ye burhi qabren tumhen kuchh nahin bataengi

mujhe talash karo dosto yahin hun main