بیمار کو مرض کی دوا دینی چاہیے

بیمار کو مرض کی دوا دینی چاہیے

میں پینا چاہتا ہوں پلا دینی چاہیے

اللہ برکتوں سے نوازے گا عشق میں

ہے جتنی پونجی پاس لگا دینی چاہیے

دل بھی کسی فقیر کے حجرے سے کم نہیں

دنیا یہیں پہ لا کے چھپا دینی چاہیے

میں خود بھی کرنا چاہتا ہوں اپنا سامنا

تجھ کو بھی اب نقاب اٹھا دینی چاہیے

میں پھول ہوں تو پھول کو گلدان ہو نصیب

میں آگ ہوں تو آگ بجھا دینی چاہیے

میں تاج ہوں تو تاج کو سر پر سجائیں لوگ

میں خاک ہوں تو خاک اڑا دینی چاہیے

میں جبر ہوں تو جبر کی تائید بند ہو

میں صبر ہوں تو مجھ کو دعا دینی چاہیے

میں خواب ہوں تو خواب سے چونکایئے مجھے

میں نیند ہوں تو نیند اڑا دینی چاہیے

سچ بات کون ہے جو سر عام کہہ سکے

میں کہہ رہا ہوں مجھ کو سزا دینی چاہیے

bimar ko maraz ki dawa deni chahiye

main pina chahta hun pila deni chahiye

allah barkaton se nawazega ishq mein

hai jitni punji pas laga deni chahiye

dil bhi kisi faqir ke hujre se kam nahin

duniya yahin pe la ke chhupa deni chahiye

main khud bhi karna chahta hun apna samna

tujh ko bhi ab naqab utha deni chahiye

main phul hun to phul ko guldan ho nasib

main ag hun to ag bujha deni chahiye

main taj hun to taj ko sar par sajaen log

main khak hun to khak ura deni chahiye

main jabr hun to jabr ki taid band ho

main sabr hun to mujh ko dua deni chahiye

main khwab hun to khwab se chaunkaiye mujhe

main nind hun to nind ura deni chahiye

sach bat kaun hai jo sar-e-am kah sake

main kah raha hun mujh ko saza deni chahiye