شرمندہ انہیں اور بھی اے میرے خدا کر

شرمندہ انہیں اور بھی اے میرے خدا کر

دستار جنہیں دی ہے انہیں سر بھی عطا کر

لوٹا ہے سدا جس نے ہمیں دوست بنا کر

ہم خوش ہیں اسی شخص سے پھر ہاتھ ملا کر

ڈر ہے کہ نہ لے جائے وہ ہم کو بھی چرا کر

ہم لائے ہیں گھر میں جسے مہمان بنا کر

اک موج دبے پاؤں تعاقب میں چلی آئی

ہم خوش تھے بہت ریت کی دیوار بنا کر

ہم چاہیں کہ مل جائیں ہمیں ڈھیر سے موتی

سیڑھی کسی پر ہول سمندر میں لگا کر

درکار اجالا ہے مگر سہمے ہوئے ہیں

کر دے نہ اندھیرا کوئی بارود جلا کر

لے اس نے ترا کاسۂ جاں توڑ ہی ڈالا

جا کوچۂ قاتل میں قتیلؔ اور صدا کر

sharminda unhen aur bhi ai mere khuda kar

dastar jinhen di hai unhen sar bhi ata kar

lauta hai sada jis ne hamen dost bana kar

ham khush hain usi shakhs se phir hath mila kar

dar hai ke na le jae wo ham ko bhi chura kar

ham lae hain ghar mein jise mehman bana kar

ik mauj dabe paon taaqub mein chali ai

ham khush the bahut ret ki diwar bana kar

ham chahen ke mil jaen hamen dher se moti

sirhi kisi pur haul samundar mein laga kar

darkar ujala hai magar sahme hue hain

kar de na andhera koi barud jala kar

le us ne tira kasa-e-jan tor hi dala

ja kucha-e-qatil mein qatil aur sada kar