ہو چکا انتظار سونے دے
Qateel Shifai (1919–2001)ہو چکا انتظار سونے دے
اے دل بے قرار سونے دے
مٹ گئیں رونقیں چراغوں کی
لٹ گئے رہ گزار سونے دے
آہٹوں کے فریب میں مت آ
ان کا کیا اعتبار سونے دے
پی لئے آنسوؤں کے جام بہت
ٹوٹتا ہے خمار سونے دے
تو نے دیکھی تو ہوگی شام خزاں
اے مریض بہار سونے دے
اونگھتا ہے اداس پیڑوں پر
چاندنی کا غبار سونے دے
آخر شب نہ کوئی آئے گا
میرے شب زندہ دار سونے دے
دور اس پار دیکھتا کیا ہے
واقف خوئے یار سونے دے
بن گئے ہیں ہمارے سینے میں
حسرتوں کے مزار سونے دے
ho chuka intizar sone de
ai dil-e-be qarar sone de
mit gain raunaqen charaghon ki
lut gae rah guzar sone de
ahaton ke fareb mein mat a
un ka kya etibar sone de
pi liye ansuon ke jam bahut
tutta hai khumar sone de
tu ne dekhi to hogi sham-e-khizan
ai mariz-e-bahar sone de
unghta hai udas peron par
chandni ka ghubar sone de
akhir-e-shab na koi aega
mere shab zinda dar sone de
dur us par dekhta kya hai
waqif-e-khu-e-yar sone de
ban gae hain hamare sine mein
hasraton ke mazar sone de