سسکیاں لیتی ہوئی غمگیں ہواؤ چپ رہو

سسکیاں لیتی ہوئی غمگیں ہواؤ چپ رہو

سو رہے ہیں درد ان کو مت جگاؤ چپ رہو

رات کا پتھر نہ پگھلے گا شعاعوں کے بغیر

صبح ہونے تک نہ بولو ہم نواؤ چپ رہو

بند ہیں سب مے کدے ساقی بنے ہیں محتسب

اے گرجتی گونجتی کالی گھٹاؤ چپ رہو

تم کو ہے معلوم آخر کون سا موسم ہے یہ

فصل گل آنے تلک اے خوش نواؤ چپ رہو

سوچ کی دیوار سے لگ کر ہیں غم بیٹھے ہوئے

دل میں بھی نغمہ نہ کوئی گنگناؤ چپ رہو

چھٹ گئے حالات کے بادل تو دیکھا جائے گا

وقت سے پہلے اندھیرے میں نہ جاؤ چپ رہو

دیکھ لینا گھر سے نکلے گا نہ ہم سایہ کوئی

اے مرے یارو مرے درد آشناؤ چپ رہو

کیوں شریک غم بناتے ہو کسی کو اے قتیلؔ

اپنی سولی اپنے کاندھے پر اٹھاؤ چپ رہو

siskiyan leti hui ghamgin hawao chup raho

so rahe hain dard un ko mat jagao chup raho

rat ka patthar na pighlega shuaon ke baghair

subh hone tak na bolo ham niwao chup raho

band hain sab mai kade saqi bane hain mohtasib

ai garajti gunjti kali ghatao chup raho

tum ko hai maalum akhir kaun sa mausam hai ye

fasl-e-gul ane talak ai khush niwao chup raho

soch ki diwar se lag kar hain gham baithe hue

dil mein bhi naghma na koi gungunao chup raho

chhut gae halat ke badal to dekha jaega

waqt se pahle andhere mein na jao chup raho

dekh lena ghar se niklega na ham saya koi

ai mire yaro mire dard ashnao chup raho

kyun sharik-e-gham banate ho kisi ko ai qatil

apni suli apne kandhe par uthao chup raho