پیار کی راہ میں ایسے بھی مقام آتے ہیں

پیار کی راہ میں ایسے بھی مقام آتے ہیں

صرف آنسو جہاں انسان کے کام آتے ہیں

ان کی آنکھوں سے رکھے کیا کوئی امید کرم

پیاس مٹ جائے تو گردش میں وہ جام آتے ہیں

زندگی بن کے وہ چلتے ہیں مری سانس کے ساتھ

ان کو ایسے کئی انداز خرام آتے ہیں

ہم نہ چاہیں تو کبھی شام کے سائے نہ ڈھلیں

ہم تڑپتے ہیں تو صبحوں کے سلام آتے ہیں

ہم پہ ہو جائیں نہ کچھ اور بھی راتیں بھاری

یاد اکثر وہ ہمیں اب سر شام آتے ہیں

چھن گئے ہم سے جو حالات کی راہوں میں قتیلؔ

ان حسینوں کے ہمیں اب بھی پیام آتے ہیں

pyar ki rah mein aise bhi maqam ate hain

sirf ansu jahan insan ke kam ate hain

un ki ankhon se rakhe kya koi ummid-e-karam

pyas mit jae to gardish mein wo jam ate hain

zindagi ban ke wo chalte hain miri sans ke sath

un ko aise kai andaz-e-khiram ate hain

ham na chahen to kabhi sham ke sae na dhalen

ham tarapte hain to subhon ke salam ate hain

ham pe ho jaen na kuchh aur bhi raten bhari

yad aksar wo hamen ab sar-e-sham ate hain

chhin gae ham se jo halat ki rahon mein qatil

un hasinon ke hamen ab bhi payam ate hain