ہاتھ دیا اس نے مرے ہاتھ میں

ہاتھ دیا اس نے مرے ہاتھ میں

میں تو ولی بن گیا اک رات میں

عشق کرو گے تو کماؤ گے نام

تہمتیں بٹتی نہیں خیرات میں

عشق بری شے سہی پر دوستو

دخل نہ دو تم مری ہر بات میں

مجھ پہ توجہ ہے سب آفات کی

کوئی کشش تو ہے مری ذات میں

راہنما تھا مرا اک سامری

کھو گیا میں شہر طلسمات میں

مجھ کو لگا عام سا اک آدمی

آیا وہ جب کام کے اوقات میں

شام کی گل رنگ ہوا کیا چلی

درد مہکنے لگا جذبات میں

ہاتھ میں کاغذ کی لیے چھتریاں

گھر سے نہ نکلا کرو برسات میں

ربط بڑھایا نہ قتیلؔ اس لیے

فرق تھا دونوں کے خیالات میں

hath diya us ne mire hath mein

main to wali ban gaya ik rat mein

ishq karoge to kamaoge nam

tohmaten batti nahin khairat mein

ishq buri shai sahi par dosto

dakhl na do tum miri har bat mein

mujh pe tawajjoh hai sab afat ki

koi kashish to hai miri zat mein

rahnuma tha mira ik samri

kho gaya main shahr tilismat mein

mujh ko laga am sa ik admi

aya wo jab kam ke auqat mein

sham ki gul rang hua kya chali

dard mahakne laga jazbat mein

hath mein kaghaz ki liye chhatriyan

ghar se na nikla karo barsat mein

rabt barhaya na qatil is liye

farq tha donon ke khayalat mein