اسے منا کر غرور اس کا بڑھا نہ دینا

اسے منا کر غرور اس کا بڑھا نہ دینا

وہ سامنے آئے بھی تو اس کو صدا نہ دینا

خلوص کو جو خوشامدوں میں شمار کر لیں

تم ایسے لوگوں کو تحفتاً بھی وفا نہ دینا

وہ جس کی ٹھوکر میں ہو سنبھلنے کا درس شامل

تم ایسے پتھر کو راستے سے ہٹا نہ دینا

سزا گناہوں کی دینا اس کو ضرور لیکن

وہ آدمی ہے تم اس کی عظمت گھٹا نہ دینا

جہاں رفاقت ہو فتنہ پرداز مولوی کی

بہشت ایسی کسی کو میرے خدا نہ دینا

قتیلؔ مجھ کو یہی سکھایا مرے نبیؐ نے

کہ فتح پا کر بھی دشمنوں کو سزا نہ دینا

use mana kar ghurur us ka barha na dena

wo samne ae bhi to us ko sada na dena

khulus ko jo khushamadon mein shumar kar len

tum aise logon ko tuhafta bhi wafa na dena

wo jis ki thokar mein ho sambhalne ka dars shamil

tum aise patthar ko raste se hata na dena

saza gunahon ki dena us ko zarur lekin

wo admi hai tum us ki azmat ghata na dena

jahan rifaqat ho fitna pardaz maulawi ki

bahisht aisi kisi ko mere khuda na dena

qatil mujh ko yahi sikhaya mire nabi ne

ke fath pa kar bhi dushmanon ko saza na dena