مرحلہ رات کا جب آئے گا

مرحلہ رات کا جب آئے گا

جسم سائے کو ترس جائے گا

چل پڑی رسم جو کج فہمی کی

بات کیا پھر کوئی کر پائے گا

سچ سے کترائے اگر لوگ یہاں

لفظ مفہوم سے کترائے گا

اعتبار اس کا ہمیشہ کرنا

وہ تو جھوٹی بھی قسم کھائے گا

تو نہ ہوگی تو پھر اے شام فراق

کون آ کر ہمیں بہلائے گا

ہم اسے یاد بہت آئیں گے

جب اسے بھی کوئی ٹھکرائے گا

کائنات اس کی مری ذات میں ہے

مجھ کو کھو کر وہ کسے پائے گا

نہ رہے جب وہ بھلے دن بھی قتیلؔ

یہ زمانہ بھی گزر جائے گا

marhala rat ka jab aega

jism sae ko taras jaega

chal pari rasm jo kaj fahmi ki

bat kya phir koi kar paega

sach se katrae agar log yahan

lafz mafhum se katraega

etibar us ka hamesha karna

wo to jhuti bhi qasam khaega

tu na hogi to phir ai sham-e-firaq

kaun a kar hamen bahlaega

ham use yad bahut aenge

jab use bhi koi thukraega

kainat us ki miri zat mein hai

mujh ko kho kar wo kise paega

na rahe jab wo bhale din bhi qatil

ye zamana bhi guzar jaega