کھلا ہے جھوٹ کا بازار آؤ سچ بولیں

کھلا ہے جھوٹ کا بازار آؤ سچ بولیں

نہ ہو بلا سے خریدار آؤ سچ بولیں

سکوت چھایا ہے انسانیت کی قدروں پر

یہی ہے موقع اظہار آؤ سچ بولیں

ہمیں گواہ بنایا ہے وقت نے اپنا

بنام عظمت کردار آؤ سچ بولیں

سنا ہے وقت کا حاکم بڑا ہی منصف ہے

پکار کر سر دربار آؤ سچ بولیں

تمام شہر میں کیا ایک بھی نہیں منصور

کہیں گے کیا رسن و دار آؤ سچ بولیں

بجا کہ خوئے وفا ایک بھی حسیں میں نہیں

کہاں کے ہم بھی وفادار آؤ سچ بولیں

جو وصف ہم میں نہیں کیوں کریں کسی میں تلاش

اگر ضمیر ہے بیدار آؤ سچ بولیں

چھپائے سے کہیں چھپتے ہیں داغ چہرے کے

نظر ہے آئنہ بردار آؤ سچ بولیں

قتیلؔ جن پہ سدا پتھروں کو پیار آیا

کدھر گئے وہ گنہ گار آؤ سچ بولیں

khula hai jhut ka bazar ao sach bolen

na ho bala se kharidar ao sach bolen

sukut chhaya hai insaniyat ki qadron par

yahi hai mauqaa izhar ao sach bolen

hamen gawah banaya hai waqt ne apna

banam-e-azmat kirdar ao sach bolen

suna hai waqt ka hakim bara hi munsif hai

pukar kar sar-e-darbar ao sach bolen

tamam shahr mein kya ek bhi nahin mansur

kahenge kya rasan-o-dar ao sach bolen

baja ke khu-e-wafa ek bhi hasin mein nahin

kahan ke ham bhi wafadar ao sach bolen

jo wasf ham mein nahin kyun karen kisi mein talash

agar zamir hai bedar ao sach bolen

chhupae se kahin chhupte hain dagh chehre ke

nazar hai aina bardar ao sach bolen

qatil jin pe sada pattharon ko pyar aya

kidhar gae wo gunah gar ao sach bolen