میں نے پوچھا پہلا پتھر مجھ پر کون اٹھائے گا

میں نے پوچھا پہلا پتھر مجھ پر کون اٹھائے گا

آئی اک آواز کہ تو جس کا محسن کہلائے گا

پوچھ سکے تو پوچھے کوئی روٹھ کے جانے والوں سے

روشنیوں کو میرے گھر کا رستہ کون بتائے گا

ڈالی ہے اس خوش فہمی نے عادت مجھ کو سونے کی

نکلے گا جب سورج تو خود مجھ کو آن جگائے گا

لوگو میرے ساتھ چلو تم جو کچھ ہے وہ آگے ہے

پیچھے مڑ کر دیکھنے والا پتھر کا ہو جائے گا

دن میں ہنس کر ملنے والے چہرے صاف بتاتے ہیں

ایک بھیانک سپنا مجھ کو ساری رات ڈرائے گا

میرے بعد وفا کا دھوکا اور کسی سے مت کرنا

گالی دے گی دنیا تجھ کو سر میرا جھک جائے گا

سوکھ گئی جب آنکھوں میں پیار کی نیلی جھیل قتیلؔ

تیرے درد کا زرد سمندر کاہے شور مچائے گا

main ne puchha pahla patthar mujh par kaun uthaega

ai ik awaz ke tu jis ka mohsin kahlaega

puchh sake to puchhe koi ruth ke jane walon se

raushniyon ko mere ghar ka rasta kaun bataega

dali hai is khush fahmi ne adat mujh ko sone ki

niklega jab suraj to khud mujh ko an jagaega

logo mere sath chalo tum jo kuchh hai wo age hai

pichhe mur kar dekhne wala patthar ka ho jaega

din mein hans kar milne wale chehre saf batate hain

ek bhayanak sapna mujh ko sari rat daraega

mere baad wafa ka dhoka aur kisi se mat karna

gali degi duniya tujh ko sar mera jhuk jaega

sukh gai jab ankhon mein pyar ki nili jhil qatil

tere dard ka zard samundar kahe shor machaega