تمہاری انجمن سے اٹھ کے دیوانے کہاں جاتے

تمہاری انجمن سے اٹھ کے دیوانے کہاں جاتے

جو وابستہ ہوئے تم سے وہ افسانے کہاں جاتے

نکل کر دیر و کعبہ سے اگر ملتا نہ مے خانہ

تو ٹھکرائے ہوئے انساں خدا جانے کہاں جاتے

تمہاری بے رخی نے لاج رکھ لی بادہ خانے کی

تم آنکھوں سے پلا دیتے تو پیمانے کہاں جاتے

چلو اچھا ہوا کام آ گئی دیوانگی اپنی

وگرنہ ہم زمانے بھر کو سمجھانے کہاں جاتے

قتیلؔ اپنا مقدر غم سے بیگانہ اگر ہوتا

تو پھر اپنے پرائے ہم سے پہچانے کہاں جاتے

tumhari anjuman se uth ke diwane kahan jate

jo wabasta hue tum se wo afsane kahan jate

nikal kar dair-o-kaaba se agar milta na mai khana

tu thukrae hue insan khuda jane kahan jate

tumhari be rukhi ne laj rakh li bada khane ki

tum ankhon se pila dete to paimane kahan jate

chalo achchha hua kam a gai diwangi apni

wagarna ham zamane bhar ko samjhane kahan jate

qatil apna muqaddar gham se begana agar hota

to phir apne parae ham se pahchane kahan jate