یہ معجزہ بھی محبت کبھی دکھائے مجھے

یہ معجزہ بھی محبت کبھی دکھائے مجھے

کہ سنگ تجھ پہ گرے اور زخم آئے مجھے

میں اپنے پاؤں تلے روندتا ہوں سائے کو

بدن مرا ہی سہی دوپہر نہ بھائے مجھے

بہ رنگ عود ملے گی اسے مری خوشبو

وہ جب بھی چاہے بڑے شوق سے جلائے مجھے

میں گھر سے تیری تمنا پہن کے جب نکلوں

برہنہ شہر میں کوئی نظر نہ آئے مجھے

وہی تو سب سے زیادہ ہے نکتہ چیں میرا

جو مسکرا کے ہمیشہ گلے لگائے مجھے

میں اپنے دل سے نکالوں خیال کس کس کا

جو تو نہیں تو کوئی اور یاد آئے مجھے

زمانہ درد کے صحرا تک آج لے آیا

گزار کر تری زلفوں کے سائے سائے مجھے

وہ میرا دوست ہے سارے جہاں کو ہے معلوم

دغا کرے وہ کسی سے تو شرم آئے مجھے

وہ مہرباں ہے تو اقرار کیوں نہیں کرتا

وہ بد گماں ہے تو سو بار آزمائے مجھے

میں اپنی ذات میں نیلام ہو رہا ہوں قتیلؔ

غم حیات سے کہہ دو خرید لائے مجھے

ye mojiza bhi mohabbat kabhi dikhae mujhe

ke sang tujh pe gire aur zakhm ae mujhe

main apne paon tale rondata hun sae ko

badan mira hi sahi dopahar na bhae mujhe

ba rang ud milegi use miri khushbu

wo jab bhi chahe bare shauq se jalae mujhe

main ghar se teri tamanna pahan ke jab niklun

barahna shahr mein koi nazar na ae mujhe

wahi to sab se ziyada hai nukta chin mera

jo muskura ke hamesha gale lagae mujhe

main apne dil se nikalun khayal kis kis ka

jo tu nahin to koi aur yad ae mujhe

zamana dard ke sahra tak aj le aya

guzar kar tiri zulfon ke sae sae mujhe

wo mera dost hai sare jahan ko hai maalum

dagha kare wo kisi se to sharm ae mujhe

wo mehrban hai to iqrar kyun nahin karta

wo bad guman hai to sau bar azmae mujhe

main apni zat mein nilam ho raha hun qatil

gham-e-hayat se kah do kharid lae mujhe