تم پوچھو اور میں نہ بتاؤں ایسے تو حالات نہیں

تم پوچھو اور میں نہ بتاؤں ایسے تو حالات نہیں

ایک ذرا سا دل ٹوٹا ہے اور تو کوئی بات نہیں

کس کو خبر تھی سانولے بادل بن برسے اڑ جاتے ہیں

ساون آیا لیکن اپنی قسمت میں برسات نہیں

ٹوٹ گیا جب دل تو پھر یہ سانس کا نغمہ کیا معنی

گونج رہی ہے کیوں شہنائی جب کوئی بارات نہیں

غم کے اندھیارے میں تجھ کو اپنا ساتھی کیوں سمجھوں

تو پھر تو ہے میرا تو سایہ بھی میرے ساتھ نہیں

مانا جیون میں عورت اک بار محبت کرتی ہے

لیکن مجھ کو یہ تو بتا دے کیا تو عورت ذات نہیں

ختم ہوا میرا فسانہ اب یہ آنسو پونچھ بھی لو

جس میں کوئی تارا چمکے آج کی رات وہ رات نہیں

میرے غمگیں ہونے پر احباب ہیں یوں حیران قتیلؔ

جیسے میں پتھر ہوں میرے سینے میں جذبات نہیں

tum puchho aur main na bataun aise to halat nahin

ek zara sa dil tuta hai aur to koi bat nahin

kis ko khabar thi sanwale badal ban barse ur jate hain

sawan aya lekin apni qismat mein barsat nahin

tut gaya jab dil to phir ye sans ka naghma kya maani

gunj rahi hai kyun shahnai jab koi barat nahin

gham ke andhiyare mein tujh ko apna sathi kyun samjhun

to phir to hai mera to saya bhi mere sath nahin

mana jiwan mein aurat ik bar mohabbat karti hai

lekin mujh ko ye to bata de kya to aurat zat nahin

khatm hua mera fasana ab ye ansu ponchh bhi lo

jis mein koi tara chamke aj ki rat wo rat nahin

mere ghamgin hone par ahbab hain yun hairan qatil

jaise main patthar hun mere sine mein jazbat nahin