اپنے ہاتھوں کی لکیروں میں سجا لے مجھ کو

اپنے ہاتھوں کی لکیروں میں سجا لے مجھ کو

میں ہوں تیرا تو نصیب اپنا بنا لے مجھ کو

میں جو کانٹا ہوں تو چل مجھ سے بچا کر دامن

میں ہوں گر پھول تو جوڑے میں سجا لے مجھ کو

ترک الفت کی قسم بھی کوئی ہوتی ہے قسم

تو کبھی یاد تو کر بھولنے والے مجھ کو

مجھ سے تو پوچھنے آیا ہے وفا کے معنی

یہ تری سادہ دلی مار نہ ڈالے مجھ کو

میں سمندر بھی ہوں موتی بھی ہوں غوطہ زن بھی

کوئی بھی نام مرا لے کے بلا لے مجھ کو

تو نے دیکھا نہیں آئینے سے آگے کچھ بھی

خود پرستی میں کہیں تو نہ گنوا لے مجھ کو

باندھ کر سنگ وفا کر دیا تو نے غرقاب

کون ایسا ہے جو اب ڈھونڈ نکالے مجھ کو

خود کو میں بانٹ نہ ڈالوں کہیں دامن دامن

کر دیا تو نے اگر میرے حوالے مجھ کو

میں کھلے در کے کسی گھر کا ہوں ساماں پیارے

تو دبے پاؤں کبھی آ کے چرا لے مجھ کو

کل کی بات اور ہے میں اب سا رہوں یا نہ رہوں

جتنا جی چاہے ترا آج ستا لے مجھ کو

بادہ پھر بادہ ہے میں زہر بھی پی جاؤں قتیلؔ

شرط یہ ہے کوئی بانہوں میں سنبھالے مجھ کو

apne hathon ki lakiron mein saja le mujh ko

main hun tera to nasib apna bana le mujh ko

main jo kanta hun to chal mujh se bacha kar daman

main hun gar phul to jore mein saja le mujh ko

tark-e-ulfat ki qasam bhi koi hoti hai qasam

tu kabhi yad to kar bhulne wale mujh ko

mujh se to puchhne aya hai wafa ke maani

ye tiri sada dili mar na dale mujh ko

main samundar bhi hun moti bhi hun ghauta zan bhi

koi bhi nam mira le ke bala le mujh ko

tu ne dekha nahin aine se age kuchh bhi

khud parasti mein kahin to na ganwa le mujh ko

bandh kar sang wafa kar diya tu ne gharqab

kaun aisa hai jo ab dhund nikale mujh ko

khud ko main bant na dalun kahin daman daman

kar diya tu ne agar mere hawale mujh ko

main khule dar ke kisi ghar ka hun saman pyare

tu dabe paon kabhi a ke chura le mujh ko

kal ki bat aur hai main ab sa rahun ya na rahun

jitna ji chahe tira aj sata le mujh ko

bada phir bada hai main zahr bhi pi jaun qatil

shart ye hai koi banhon mein sambhale mujh ko