شکست دل میں بھی اک زندگی نظر آئی

شکست دل میں بھی اک زندگی نظر آئی

دیا بجھا تو ہمیں روشنی نظر آئی

فراز دار پہ کوئی ہمیں نہ پہچانا

زمانے والوں کو خوش قامتی نظر آئی

سر دیار وفا دوستوں کے جھرمٹ میں

دریدہ جسم لیے دوستی نظر آئی

اب اور طرز سے نقارۂ خدا گونجے

زبان خلق تو خاموش ہی نظر آئی

وہ رکھ رکھاؤ نہ دیکھا دیے کے جلنے میں

جو اس کے بجھنے میں شائستگی نظر آئی

shikast-e-dil mein bhi ik zindagi nazar ai

diya bujha to hamen raushni nazar ai

faraz-e-dar pe koi hamen na pahchana

zamane walon ko khush qamati nazar ai

sar-e-dayar-e-wafa doston ke jhurmut mein

darida jism liye dosti nazar ai

ab aur tarz se naqqara-e-khuda gunje

zaban-e-khalq to khamosh hi nazar ai

wo rakh rakhao na dekha diye ke jalne mein

jo us ke bujhne mein shaistagi nazar ai