جیسے یاد انبساط و غم شکیبائی کے بعد

جیسے یاد انبساط و غم شکیبائی کے بعد

دیر تک روتے رہے ہم بزم آرائی کے بعد

اے سرشت شوق اب ناپید ہو کر دیکھ لے

اور کیا ہونا ہے اس ہونے کی رسوائی کے بعد

اس قدر سفاک کب تھی وقت کی بے منظری

کور چشمی سے بھی بڑھ کر دکھ ہیں بینائی کے بعد

خود کو پا لینے کی حسرت میں بہت رسوا ہوئے

کچھ سوا رسوائیاں ہیں اب شناسائی کے بعد

بے مسافت اک سفر در پیش رہنا چاہیے

سوچتے ہیں عمر بھر کی جادہ پیمائی کے بعد

کل میں خود سے سلسلہ در سلسلہ ملتا رہا

عالم تنہائی جیسے دشت تنہائی کے بعد

ہے وہی صحرا مگر شاداب کتنا ہو گیا

رہروان جنوں کی آبلہ پائی کے بعد

دل میں اب پہلی سی وہ گنجائشیں باقی نہیں

پہلے اک دالان آ جانا تھا انگنائی کے بعد

jaise yad-e-imbisat-o-gham shakebai ke baad

der tak rote rahe ham bazm arai ke baad

ai sarisht-e-shauq ab napaid ho kar dekh le

aur kya hona hai is hone ki ruswai ke baad

is qadar saffak kab thi waqt ki be manzari

kor chashmi se bhi barh kar dukh hain binai ke baad

khud ko pa lene ki hasrat mein bahut ruswa hue

kuchh siwa ruswaiyan hain ab shanasai ke baad

be masafat ik safar dar pesh rahna chahiye

sochte hain umr bhar ki jada paimai ke baad

kal main khud se silsila dar silsila milta raha

alam-e-tanhai jaise dasht-e-tanhai ke baad

hai wahi sahra magar shadab kitna ho gaya

rahrawan-e-junun ki abla pai ke baad

dil mein ab pahli si wo gunjaishen baqi nahin

pahle ik dalan a jana tha angnai ke baad