اٹھ رہا ہے آشیانوں سے دھواں دیکھے گا کون

اٹھ رہا ہے آشیانوں سے دھواں دیکھے گا کون

ہے مگر تعبیر خواب رائیگاں دیکھے گا کون

جل رہی ہے دل میں اک آفاق سے رشتے کی لو

جیسے ہم دیکھے ہیں سوئے آسماں دیکھے گا کون

تو بہت آئندگاں کا کھینچتا ہے انتظار

بے خبر وہ رونق آئندگاں دیکھے گا کون

ایک احساس شکست شب بہت روشن مگر

بے کراں اس بے حسی کے درمیاں دیکھے گا کون

آرزو کا اک جہان تازہ بھی منظر میں ہے

میں جسے پہچانتا ہوں وہ جہاں دیکھے گا کون

راستے روشن بہت کرتا رہا ہوں زیر پا

دور تک پھیلے ہیں قدموں کے نشاں دیکھے گا کون

داد جانکاہی کی کس سے پائیں اب اہل ہنر

خوں چکیدہ خامہ رستی انگلیاں دیکھے گا کون

دیکھتے ہیں سب فروع شوق کی زیبائشیں

کم نہیں کچھ یہ مآل شوق ہاں دیکھے گا کون

رفتہ رفتہ ہو رہے گا زخم دل کا اندمال

بجھتے بجھتے بجھ ہی جائے گی فغاں دیکھے گا کون

دیکھ دل میں ہو رہا ہے اک نیا منظر طلوع

جو ادھر بکھری پڑی ہے کہکشاں دیکھے گا کون

uth raha hai ashiyanon se dhuan dekhega kaun

hai magar taabir khwab raigan dekhega kaun

jal rahi hai dil mein ik afaq se rishte ki lau

jaise ham dekhe hain su-e-asman dekhega kaun

to bahut aindagan ka khinchta hai intizar

be khabar wo raunaq-e-aindagan dekhega kaun

ek ehsas-e-shikast-e-shab bahut raushan magar

be karan us be hissi ke darmiyan dekhega kaun

arzu ka ik jahan-e-taza bhi manzar mein hai

main jise pahchanta hun wo jahan dekhega kaun

raste raushan bahut karta raha hun zer-e-pa

dur tak phaile hain qadmon ke nishan dekhega kaun

dad jankahi ki kis se paen ab ahl-e-hunar

khun chukida khama risti ungliyan dekhega kaun

dekhte hain sab faro-e-shauq ki zebaishen

kam nahin kuchh ye maal-e-shauq han dekhega kaun

rafta rafta ho rahega zakhm-e-dil ka indimal

bujhte bujhte bujh hi jaegi fughan dekhega kaun

dekh dil mein ho raha hai ik naya manzar tulu

jo idhar bikhri pari hai kahkashan dekhega kaun