عشق نے ہم کو جنوں آثار ایسا کر دیا

عشق نے ہم کو جنوں آثار ایسا کر دیا

بستۂ ساحل بھی رکھا اور دریا کر دیا

اس گلستان گماں میں ہم بھی تھے مانند خواب

گرمیٔ اندیشہ نے ہم کو بھی صحرا کر دیا

دیدۂ خوش بیں کی یہ اعجاز فرمائی تو دیکھ

کیسے مبہم خال و خط کو ایک چہرا کر دیا

یہ جہاں پنہاں تھا اک بے منظری کی خاک میں

ہم نے چشم شوق سے دیکھا تو دنیا کر دیا

روشنیٔ طبع نے روشن کیا ہے اک جہاں

اور مجھے اس آئنہ خانے میں تنہا کر دیا

جب کبھی شب زاد لمحے گھیرنے آئے ہمیں

ہم نے شمع جاں جلائی اور سویرا کر دیا

یہ کرامت بھی عجب اس کی مسیحائی میں ہے

جو بہ ظاہر بھر دیا وہ زخم گہرا کر دیا

منتظر تھا وقت سو ہم نے بہ انداز سخن

آرزو کا اک جہان تازہ پیدا کر دیا

ishq ne ham ko junun asar aisa kar diya

basta-e-sahil bhi rakha aur dariya kar diya

is gulistan-e-guman mein ham bhi the manind-e-khwab

garmi-e-andesha ne ham ko bhi sahra kar diya

dida-e-khush bin ki ye ejaz farmai to dekh

kaise mubham khal-o-khat ko ek chehra kar diya

ye jahan pinhan tha ik be manzari ki khak mein

ham ne chashm-e-shauq se dekha to duniya kar diya

raushni-e-taba ne raushan kiya hai ik jahan

aur mujhe is aina khane mein tanha kar diya

jab kabhi shab zad lamhe gherne ae hamen

ham ne sham-e-jan jalai aur sawera kar diya

ye karamat bhi ajab us ki masihai mein hai

ju ba zahir bhar diya wo zakhm gahra kar diya

muntazir tha waqt so ham ne ba andaz-e-sukhan

arzu ka ik jahan-e-taza paida kar diya