ہے جبر وقت کا قصہ عجب سنائے کون

ہے جبر وقت کا قصہ عجب سنائے کون

میں یاد اس کو کروں اور یاد آئے کون

یہ بات بجھتے دیوں نے کسی سے پوچھی تھی

جلے تو ہم تھے مگر خیر جگمگائے کون

اسے تلاش تو کرنا ہے پھر یہ سوچتا ہوں

زمانہ اور ہے اب زحمتیں اٹھائے کون

یہاں تو اپنے چراغوں کی فکر ہے سب کو

دیا جلایا ہے سب نے دیے جلائے کون

یہاں تو لوگ انہی حیرتوں میں جیتے ہیں

کہ تیر کس پہ چلے اور زخم کھائے کون

یہاں تو جاگتی آنکھوں میں خواب جاگتے ہیں

جو جاگتے ہوں انہیں خواب سے جگائے کون

یہاں کسی کو کسی کی خبر نہیں ملتی

مگر یہ بے خبری کی خبر سنائے کون

یہاں تو صبح سے پہلے ہی بزم برہم ہے

دیا بجھا دے کوئی پر دیا بجھائے کون

hai jabr waqt ka qissa ajab sunae kaun

main yad us ko karun aur yad ae kaun

ye bat bujhte diyon ne kisi se puchhi thi

jale to ham the magar khair jagmagae kaun

use talash to karna hai phir ye sochta hun

zamana aur hai ab zahmaten uthae kaun

yahan to apne charaghon ki fikr hai sab ko

diya jalaya hai sab ne diye jalae kaun

yahan to log unhi hairaton mein jite hain

ke tir kis pe chale aur zakhm khae kaun

yahan to jagti ankhon mein khwab jagte hain

jo jagte hun unhen khwab se jagae kaun

yahan kisi ko kisi ki khabar nahin milti

magar ye be khabari ki khabar sunae kaun

yahan to subh se pahle hi bazm barham hai

diya bujha de koi par diya bujhae kaun