کار خلوص یار کا مجھ کو یقین آ گیا

کار خلوص یار کا مجھ کو یقین آ گیا

اتنا شدید وار تھا مجھ کو یقین آ گیا

بس یوں ہی کچھ گماں سا تھا کوئی پس سخن بھی ہے

درد جو لب کشا ہوا مجھ کو یقین آ گیا

پھر وہ ہوا کا قہقہہ کان میں گونجنے لگا

اور بھی اک دیا بجھا مجھ کو یقین آ گیا

دائرہ وار تھا سفر عشق جنوں صفات کا

ہجر و وصال کچھ نہ تھا مجھ کو یقین آ گیا

اب مرا درد بجھ گیا اب مرا زخم بھر چلا

پھر وہی دوست آئے گا مجھ کو یقین آ گیا

kar khulus-e-yar ka mujh ko yaqin a gaya

itna shadid war tha mujh ko yaqin a gaya

bas yun hi kuchh guman sa tha koi pas sukhan bhi hai

dard jo lab kusha hua mujh ko yaqin a gaya

phir wo hawa ka qahqaha kan mein gunjne laga

aur bhi ik diya bujha mujh ko yaqin a gaya

daira war tha safar ishq-e-junun sifat ka

hijr-o-wisal kuchh na tha mujh ko yaqin a gaya

ab mira dard bujh gaya ab mira zakhm bhar chala

phir wahi dost aega mujh ko yaqin a gaya