کدورتوں کے درمیاں عداوتوں کے درمیاں

کدورتوں کے درمیاں عداوتوں کے درمیاں

تمام دوست اجنبی ہیں دوستوں کے درمیاں

شعور عصر ڈھونڈھتا رہا ہے مجھ کو اور میں

مگن ہوں عہد رفتگاں کی عظمتوں کے درمیاں

یہ سوچتے ہیں کب تلک ضمیر کو بچائیں گے

اگر یوں ہی جیا کیے ضرورتوں کے درمیاں

ابھی شکست کیا کہ رزم آخری اک اور ہے

پکارتی ہے زندگی ہزیمتوں کے درمیاں

ضمیر عصر میں کبھی نوائے درد میں کبھی

سخن سرا تو میں بھی ہوں صداقتوں کے درمیاں

kuduraton ke darmiyan adawaton ke darmiyan

tamam dost ajnabi hain doston ke darmiyan

shuur-e-asr dhundhta raha hai mujh ko aur main

magan hun ahd-e-raftagan ki azmaton ke darmiyan

ye sochte hain kab talak zamir ko bachaenge

agar yun hi jiya kiye zaruraton ke darmiyan

abhi shikast kya ke razm akhiri ik aur hai

pukarti hai zindagi hazemton ke darmiyan

zamir-e-asr mein kabhi nawa-e-dard mein kabhi

sukhan sara to main bhi hun sadaqaton ke darmiyan