خون سے جب جلا دیا ایک دیا بجھا ہوا

خون سے جب جلا دیا ایک دیا بجھا ہوا

پھر مجھے دے دیا گیا ایک دیا بجھا ہوا

اپنے تو عہد شوق کے مرحلے سب عجیب تھے

ہم کو وصال سا لگا ایک دیا بجھا ہوا

ایک ہی داستان شب ایک ہی سلسلہ تو ہے

ایک دیا جلا ہوا ایک دیا بجھا ہوا

شعلہ ہوا نژاد تھا پھر بھی ہوا کے ہاتھ نے

بس یہی فیصلہ لکھا ایک دیا بجھا ہوا

محفل رنگ و نور کی پھر مجھے یاد آ گئی

پھر مجھے یاد آ گیا ایک دیا بجھا ہوا

مجھ کو نشاط سے فزوں رسم وفا عزیز ہے

میرا رفیق شب رہا ایک دیا بجھا ہوا

درد کی کائنات میں مجھ سے بھی روشنی رہی

ویسے میری بساط کیا ایک دیا بجھا ہوا

سب مری روشنئ جاں حرف سخن میں ڈھل گئی

اور میں جیسے رہ گیا ایک دیا بجھا ہوا

khun se jab jala diya ek diya bujha hua

phir mujhe de diya gaya ek diya bujha hua

apne to ahd-e-shauq ke marhale sab ajib the

ham ko wisal sa laga ek diya bujha hua

ek hi dastan-e-shab ek hi silsila to hai

ek diya jala hua ek diya bujha hua

shola hua nazhad tha phir bhi hawa ke hath ne

bas yahi faisla likha ek diya bujha hua

mahfil-e-rang-o-nur ki phir mujhe yad a gai

phir mujhe yad a gaya ek diya bujha hua

mujh ko nishat se fuzun rasm-e-wafa aziz hai

mera rafiq-e-shab raha ek diya bujha hua

dard ki kainat mein mujh se bhi raushni rahi

waise meri bisat kya ek diya bujha hua

sab miri raushni-e-jan harf-e-sukhan mein dhal gai

aur main jaise rah gaya ek diya bujha hua