غم سے بہل رہے ہیں آپ آپ بہت عجیب ہیں

غم سے بہل رہے ہیں آپ آپ بہت عجیب ہیں

درد میں ڈھل رہے ہیں آپ آپ بہت عجیب ہیں

سایۂ وصل کب سے ہے آپ کا منتظر مگر

ہجر میں جل رہے ہیں آپ آپ بہت عجیب ہیں

اپنے خلاف فیصلہ خود ہی لکھا ہے آپ نے

ہاتھ بھی مل رہے ہیں آپ آپ بہت عجیب ہیں

وقت نے آرزو کی لو دیر ہوئی بجھا بھی دی

اب بھی پگھل رہے ہیں آپ آپ بہت عجیب ہیں

دائرہ وار ہی تو ہیں عشق کے راستے تمام

راہ بدل رہے ہیں آپ آپ بہت عجیب ہیں

اپنی تلاش کا سفر ختم بھی کیجئے کبھی

خواب میں چل رہے ہیں آپ آپ بہت عجیب ہیں

gham se bahal rahe hain ap ap bahut ajib hain

dard mein dhal rahe hain ap ap bahut ajib hain

saya-e-wasl kab se hai ap ka muntazir magar

hijr mein jal rahe hain ap ap bahut ajib hain

apne khilaf faisla khud hi likha hai ap ne

hath bhi mil rahe hain ap ap bahut ajib hain

waqt ne arzu ki lau der hui bujha bhi di

ab bhi pighal rahe hain ap ap bahut ajib hain

daira war hi to hain ishq ke raste tamam

rah badal rahe hain ap ap bahut ajib hain

apni talash ka safar khatm bhi kijiye kabhi

khwab mein chal rahe hain ap ap bahut ajib hain