Arooz is now on the App Store, for iPhone and iPad. Download →

All poetry

ترے کرم سے خدائی میں یوں تو کیا نہ ملا

Noon Meem Rashid (1910–1975)

ترے کرم سے خدائی میں یوں تو کیا نہ ملا

مگر جو تو نہ ملا زیست کا مزا نہ ملا

حیات شوق کی یہ گرمیاں کہاں ہوتیں

خدا کا شکر ہمیں نالۂ رسا نہ ملا

ازل سے فطرت آزاد ہی تھی آوارہ

یہ کیوں کہیں کہ ہمیں کوئی رہنما نہ ملا

یہ کائنات کسی کا غبار راہ سہی

دلیل راہ جو بنتا وہ نقش پا نہ ملا

یہ دل شہید فریب نگاہ ہو نہ سکا

وہ لاکھ ہم سے بہ انداز محرمانہ ملا

کنار موج میں مرنا تو ہم کو آتا ہے

نشان ساحل الفت ملا ملا نہ ملا

تری تلاش ہی تھی مایۂ بقائے وجود

بلا سے ہم کو سر منزل بقا نہ ملا