حسرت انتظار یار نہ پوچھ

حسرت انتظار یار نہ پوچھ

ہائے وہ شدت انتظار نہ پوچھ

رنگ گلشن دم بہار نہ پوچھ

وحشت قلب بے قرار نہ پوچھ

صدمۂ عندلیب زار نہ پوچھ

تلخ انجامئ بہار نہ پوچھ

غیر پر لطف میں رہین ستم

مجھ سے آئین بزم یار نہ پوچھ

دے دیا درد مجھ کو دل کے عوض

ہائے لطف ستم شعار نہ پوچھ

پھر ہوئی یاد مے کشی تازہ

مستی ابر نو بہار نہ پوچھ

مجھ کو دھوکا ہے تار بستر کا

نا توانئ جسم یار نہ پوچھ

میں ہوں نا آشنائے وصل ہنوز

مجھ سے کیف وصال یار نہ پوچھ

hasrat-e-intizar-e-yar na puchh

hae wo shiddat intizar na puchh

rang-e-gulshan dam-e-bahar na puchh

wahshat-e-qalb-e-be qarar na puchh

sadma-e-andalib-e-zar na puchh

talkh anjami-e-bahar na puchh

ghair pur lutf mein rahin-e-sitam

mujh se ain-e-bazm-e-yar na puchh

de diya dard mujh ko dil ke ewaz

hae lutf-e-sitam shiar na puchh

phir hui yad mai kashi taza

masti-e-abr-e-nau bahar na puchh

mujh ko dhoka hai tar-e-bistar ka

na tawani-e-jism-e-yar na puchh

main hun na ashna-e-wasl hanoz

mujh se kaif-e-wisal-e-yar na puchh