گرج برس پیاسی دھرتی پر پھر پانی دے مولا

گرج برس پیاسی دھرتی پر پھر پانی دے مولا

چڑیوں کو دانے بچوں کو گڑ دھانی دے مولا

دو اور دو کا جوڑ ہمیشہ چار کہاں ہوتا ہے

سوچ سمجھ والوں کو تھوڑی نادانی دے مولا

پھر روشن کر زہر کا پیالہ چمکا نئی صلیبیں

جھوٹوں کی دنیا میں سچ کو تابانی دے مولا

پھر مورت سے باہر آ کر چاروں اور بکھر جا

پھر مندر کو کوئی میراؔ دیوانی دے مولا

تیرے ہوتے کوئی کسی کی جان کا دشمن کیوں ہو

جینے والوں کو مرنے کی آسانی دے مولا

garaj baras pyasi dharti par phir pani de maula

chiriyon ko dane bachchon ko gur dhani de maula

do aur do ka jor hamesha char kahan hota hai

soch samajh walon ko thori nadani de maula

phir raushan kar zahr ka pyala chamka nai saliben

jhuton ki duniya mein sach ko tabani de maula

phir murat se bahar a kar charon aur bikhar ja

phir mandir ko koi mera diwani de maula

tere hote koi kisi ki jan ka dushman kyun ho

jine walon ko marne ki asani de maula