ہر ایک گھر میں دیا بھی جلے اناج بھی ہو

ہر ایک گھر میں دیا بھی جلے اناج بھی ہو

اگر نہ ہو کہیں ایسا تو احتجاج بھی ہو

رہے گی وعدوں میں کب تک اسیر خوشحالی

ہر ایک بار ہی کل کیوں کبھی تو آج بھی ہو

نہ کرتے شور شرابہ تو اور کیا کرتے

تمہارے شہر میں کچھ اور کام کاج بھی ہو

حکومتوں کو بدلنا تو کچھ محال نہیں

حکومتیں جو بدلتا ہے وہ سماج بھی ہو

بدل رہے ہیں کئی آدمی درندوں میں

مرض پرانا ہے اس کا نیا علاج بھی ہو

اکیلے غم سے نئی شاعری نہیں ہوتی

زبان میرؔ میں غالبؔ کا امتزاج بھی ہو

har ek ghar mein diya bhi jale anaj bhi ho

agar na ho kahin aisa to ehtijaj bhi ho

rahegi waadon mein kab tak asir-e-khushhali

har ek bar hi kal kyun kabhi to aj bhi ho

na karte shor sharaba to aur kiya karte

tumhare shahr mein kuchh aur kam kaj bhi ho

hukumaton ko badalna to kuchh muhal nahin

hukumaten jo badalta hai wo samaj bhi ho

badal rahe hain kai admi darindon mein

maraz purana hai us ka naya ilaj bhi ho

akele gham se nai shayari nahin hoti

zaban mir mein ghalib ka imtizaj bhi ho