Arooz is now on the App Store, for iPhone and iPad. Download →

All poetry

جب سے قریب ہو کے چلے زندگی سے ہم

Nida Fazli (1938–2016)

جب سے قریب ہو کے چلے زندگی سے ہم

خود اپنے آئنے کو لگے اجنبی سے ہم

کچھ دور چل کے راستے سب ایک سے لگے

ملنے گئے کسی سے مل آئے کسی سے ہم

اچھے برے کے فرق نے بستی اجاڑ دی

مجبور ہو کے ملنے لگے ہر کسی سے ہم

شائستہ محفلوں کی فضاؤں میں زہر تھا

زندہ بچے ہیں ذہن کی آوارگی سے ہم

اچھی بھلی تھی دنیا گزارے کے واسطے

الجھے ہوئے ہیں اپنی ہی خود آگہی سے ہم

جنگل میں دور تک کوئی دشمن نہ کوئی دوست

مانوس ہو چلے ہیں مگر بمبئی سے ہم