عشق جب زمزمہ پیرا ہوگا

عشق جب زمزمہ پیرا ہوگا

حسن خود محو تماشا ہوگا

سن کے آوازۂ زنجیر صبا

قفس غنچہ کا در وا ہوگا

جرس شوق اگر ساتھ رہی

ہر نفس شہپر عنقا ہوگا

دائم آباد رہے گی دنیا

ہم نہ ہوں گے کوئی ہم سا ہوگا

کون دیکھے گا طلوع خورشید

ذرہ جب دیدۂ بینا ہوگا

ہم تجھے بھول کے خوش بیٹھے ہیں

ہم سا بے درد کوئی کیا ہوگا

پھر سلگنے لگا صحرائے خیال

ابر گھر کر کہیں برسا ہوگا

پھر کسی دھیان کے صد راہے پر

دل حیرت زدہ تنہا ہوگا

پھر کسی صبح طرب کا جادو

پردۂ شب سے ہویدا ہوگا

گل زمینوں کے خنک رمنوں میں

جشن رامش گری برپا ہوگا

پھر نئی رت کا اشارہ پا کر

وہ سمن بو چمن آرا ہوگا

گل شب تاب کی خوشبو لے کر

ابلق صبح روانہ ہوگا

پھر سر شاخ شعاع خورشید

نکہت گل کا بسیرا ہوگا

اک صدا سنگ میں تڑپی ہوگی

اک شرر پھول میں لرزا ہوگا

تجھ کو ہر پھول میں عریاں سوتے

چاندنی رات نے دیکھا ہوگا

دیکھ کر آئنۂ آب رواں

پتہ پتہ لب گویا ہوگا

شام سے سوچ رہا ہوں ناصرؔ

چاند کس شہر میں اترا ہوگا

ishq jab zamzama paira hoga

husn-e-khud mahw-e-tamasha hoga

sun ke awaza-e-zanjir saba

qafas-e-ghuncha ka dar wa hoga

jaras-e-shauq agar sath rahi

har nafas shahpar-e-anqa hoga

daim abad rahegi duniya

ham na honge koi ham sa hoga

kaun dekhega tulu-e-khurshid

zarra jab dida-e-bina hoga

ham tujhe bhul ke khush baithe hain

ham sa be dard koi kya hoga

phir sulagne laga sahra-e-khayal

abr ghar kar kahin barsa hoga

phir kisi dhyan ke sad rahe par

dil-e-hairat zada tanha hoga

phir kisi subh tarab ka jadu

parda-e-shab se huwaida hoga

gul zaminon ke khunuk ramnon mein

jashn-e-ramish giri barpa hoga

phir nai rut ka ishara pa kar

wo saman bu chaman ara hoga

gul-e-shab tab ki khushbu le kar

ablaq-e-subh rawana hoga

phir sar-e-shakh-e-shua-e-khurshid

nikhat-e-gul ka basera hoga

ik sada sang mein tarpi hogi

ik sharar phul mein larza hoga

tujh ko har phul mein uryan sote

chandni rat ne dekha hoga

dekh kar aina-e-ab-e-rawan

pata pata lab-e-goya hoga

sham se soch raha hun nasir

chand kis shahr mein utra hoga