تو جب میرے گھر آیا تھا

تو جب میرے گھر آیا تھا

میں اک سپنا دیکھ رہا تھا

تیرے بالوں کی خوشبو سے

سارا آنگن مہک رہا تھا

چاند کی دھیمی دھیمی ضو میں

سانولا مکھڑا لو دیتا تھا

تیری نیند بھی اڑی اڑی تھی

میں بھی کچھ کچھ جاگ رہا تھا

میرے ہاتھ بھی سلگ رہے تھے

تیرا ماتھا بھی جلتا تھا

دو روحوں کا پیاسا بادل

گرج گرج کر برس رہا تھا

دو یادوں کا چڑھتا دریا

ایک ہی ساگر میں گرتا تھا

دل کی کہانی کہتے کہتے

رات کا آنچل بھیگ چلا تھا

رات گئے سویا تھا لیکن

تجھ سے پہلے جاگ اٹھا تھا

tu jab mere ghar aya tha

main ik sapna dekh raha tha

tere balon ki khushbu se

sara angan mahak raha tha

chand ki dhimi dhimi zau mein

sanwala mukhra lo deta tha

teri nind bhi uri uri thi

main bhi kuchh kuchh jag raha tha

mere hath bhi sulag rahe the

tera matha bhi jalta tha

do ruhon ka pyasa badal

garaj garaj kar baras raha tha

do yadon ka charhta dariya

ek hi sagar mein girta tha

dil ki kahani kahte kahte

rat ka anchal bhig chala tha

rat gae soya tha lekin

tujh se pahle jag utha tha