تم آ گئے ہو تو کیوں انتظار شام کریں

تم آ گئے ہو تو کیوں انتظار شام کریں

کہو تو کیوں نہ ابھی سے کچھ اہتمام کریں

خلوص و مہر و وفا لوگ کر چکے ہیں بہت

مرے خیال میں اب اور کوئی کام کریں

یہ خاص و عام کی بیکار گفتگو کب تک

قبول کیجیے جو فیصلہ عوام کریں

ہر آدمی نہیں شائستۂ رموز سخن

وہ کم سخن ہو مخاطب تو ہم کلام کریں

جدا ہوئے ہیں بہت لوگ ایک تم بھی سہی

اب اتنی بات پہ کیا زندگی حرام کریں

خدا اگر کبھی کچھ اختیار دے ہم کو

تو پہلے خاک نشینوں کا انتظام کریں

رہ طلب میں جو گمنام مر گئے ناصرؔ

متاع درد انہی ساتھیوں کے نام کریں

tum a gae ho to kyun intizar sham karen

kaho to kyun na abhi se kuchh ehtimam karen

khulus-o-mehr-o-wafa log kar chuke hain bahut

mire khayal mein ab aur koi kam karen

ye khas-o-am ki bekar guftugu kab tak

qubul kijiye jo faisla awam karen

har admi nahin shaista-e-rumuz-e-sukhan

wo kam sukhan ho mukhatib to ham kalam karen

juda hue hain bahut log ek tum bhi sahi

ab itni bat pe kya zindagi haram karen

khuda agar kabhi kuchh ikhtiyar de ham ko

tu pahle khak nashinon ka intizam karen

rah-e-talab mein jo gumnam mar gae nasir

mata-e-dard unhi sathiyon ke nam karen