دکھ کی لہر نے چھیڑا ہوگا

دکھ کی لہر نے چھیڑا ہوگا

یاد نے کنکر پھینکا ہوگا

آج تو میرا دل کہتا ہے

تو اس وقت اکیلا ہوگا

میرے چومے ہوئے ہاتھوں سے

اوروں کو خط لکھتا ہوگا

بھیگ چلیں اب رات کی پلکیں

تو اب تھک کر سویا ہوگا

ریل کی گہری سیٹی سن کر

رات کا جنگل گونجا ہوگا

شہر کے خالی اسٹیشن پر

کوئی مسافر اترا ہوگا

آنگن میں پھر چڑیاں بولیں

تو اب سو کر اٹھا ہوگا

یادوں کی جلتی شبنم سے

پھول سا مکھڑا دھویا ہوگا

موتی جیسی شکل بنا کر

آئینے کو تکتا ہوگا

شام ہوئی اب تو بھی شاید

اپنے گھر کو لوٹا ہوگا

نیلی دھندھلی خاموشی میں

تاروں کی دھن سنتا ہوگا

میرا ساتھی شام کا تارا

تجھ سے آنکھ ملاتا ہوگا

شام کے چلتے ہاتھ نے تجھ کو

میرا سلام تو بھیجا ہوگا

پیاسی کرلاتی کونجوں نے

میرا دکھ تو سنایا ہوگا

میں تو آج بہت رویا ہوں

تو بھی شاید رویا ہوگا

ناصرؔ تیرا میت پرانا

تجھ کو یاد تو آتا ہوگا

dukh ki lahr ne chhera hoga

yad ne kankar phenka hoga

aj to mera dil kahta hai

to is waqt akela hoga

mere chume hue hathon se

auron ko khat likhta hoga

bhig chalen ab rat ki palken

to ab thak kar soya hoga

rel ki gahri siti sun kar

rat ka jangal gunja hoga

shahr ke khali isteshan par

koi musafir utra hoga

angan mein phir chiriyan bolen

to ab so kar utha hoga

yadon ki jalti shabnam se

phul sa mukhra dhoya hoga

moti jaisi shakl bana kar

aine ko takta hoga

sham hui ab tu bhi shayad

apne ghar ko lauta hoga

nili dhundhuli khamoshi mein

taron ki dhun sunta hoga

mera sathi sham ka tara

tujh se ankh milata hoga

sham ke chalte hath ne tujh ko

mera salam to bheja hoga

pyasi karlati kunjon ne

mera dukh to sunaya hoga

main to aj bahut roya hun

tu bhi shayad roya hoga

nasir tera mit purana

tujh ko yad to ata hoga