وہ دل نواز ہے لیکن نظر شناس نہیں

وہ دل نواز ہے لیکن نظر شناس نہیں

مرا علاج مرے چارہ گر کے پاس نہیں

تڑپ رہے ہیں زباں پر کئی سوال مگر

مرے لیے کوئی شایان التماس نہیں

ترے جلو میں بھی دل کانپ کانپ اٹھتا ہے

مرے مزاج کو آسودگی بھی راس نہیں

کبھی کبھی جو ترے قرب میں گزارے تھے

اب ان دنوں کا تصور بھی میرے پاس نہیں

گزر رہے ہیں عجب مرحلوں سے دیدہ و دل

سحر کی آس تو ہے زندگی کی آس نہیں

مجھے یہ ڈر ہے تری آرزو نہ مٹ جائے

بہت دنوں سے طبیعت مری اداس نہیں

wo dil nawaz hai lekin nazar shanas nahin

mira ilaj mire chara gir ke pas nahin

tarap rahe hain zaban par kai sawal magar

mire liye koi shayan-e-iltimas nahin

tire jilau mein bhi dil kanp kanp uthta hai

mire mizaj ko asudgi bhi ras nahin

kabhi kabhi jo tire qurb mein guzare the

ab in dinon ka tasawwur bhi mere pas nahin

guzar rahe hain ajab marhalon se dida-o-dil

sahar ki as to hai zindagi ki as nahin

mujhe ye dar hai tiri arzu na mit jae

bahut dinon se tabiat miri udas nahin