دیار دل کی رات میں چراغ سا جلا گیا

دیار دل کی رات میں چراغ سا جلا گیا

ملا نہیں تو کیا ہوا وہ شکل تو دکھا گیا

وہ دوستی تو خیر اب نصیب دشمناں ہوئی

وہ چھوٹی چھوٹی رنجشوں کا لطف بھی چلا گیا

جدائیوں کے زخم درد زندگی نے بھر دیے

تجھے بھی نیند آ گئی مجھے بھی صبر آ گیا

پکارتی ہیں فرصتیں کہاں گئیں وہ صحبتیں

زمیں نگل گئی انہیں کہ آسمان کھا گیا

یہ صبح کی سفیدیاں یہ دوپہر کی زردیاں

اب آئنے میں دیکھتا ہوں میں کہاں چلا گیا

یہ کس خوشی کی ریت پر غموں کو نیند آ گئی

وہ لہر کس طرف گئی یہ میں کہاں سما گیا

گئے دنوں کی لاش پر پڑے رہو گے کب تلک

الم کشو اٹھو کہ آفتاب سر پہ آ گیا

dayar-e-dil ki rat mein charagh sa jala gaya

mila nahin to kya hua wo shakl to dikha gaya

wo dosti to khair ab nasib-e-dushmanan hui

wo chhoti chhoti ranjishon ka lutf bhi chala gaya

judaiyon ke zakhm dard-e-zindagi ne bhar diye

tujhe bhi nind a gai mujhe bhi sabr a gaya

pukarti hain fursaten kahan gain wo sohbaten

zamin nigal gai unhen ke asman kha gaya

ye subh ki safaidiyan ye dopahar ki zardiyan

ab aine mein dekhta hun main kahan chala gaya

ye kis khushi ki ret par ghamon ko nind a gai

wo lahr kis taraf gai ye main kahan sama gaya

gae dinon ki lash par pare rahoge kab talak

alam kasho utho ke aftab sar pe a gaya