سارے منظر ایک جیسے ساری باتیں ایک سی
Munir Niazi (1928–2006)سارے منظر ایک جیسے ساری باتیں ایک سی
سارے دن ہیں ایک سے اور ساری راتیں ایک سی
بے نتیجہ بے ثمر جنگ و جدل سود و زیاں
ساری جیتیں ایک جیسی ساری ماتیں ایک سی
سب ملاقاتوں کا مقصد کاروبار زرگری
سب کی دہشت ایک جیسی سب کی گھاتیں ایک سی
اب کسی میں اگلے وقتوں کی وفا باقی نہیں
سب قبیلے ایک ہیں اب ساری ذاتیں ایک سی
ایک ہی رخ کی اسیری خواب ہے شہروں کا اب
ان کے ماتم ایک سے ان کی براتیں ایک سی
ہوں اگر زیر زمیں تو فائدہ ہونے کا کیا
سنگ و گوہر ایک ہیں پھر ساری دھاتیں ایک سی
اے منیرؔ آزاد ہو اس سحر یک رنگی سے تو
ہو گئے سب زہر یکساں سب نباتیں ایک سی
sare manzar ek jaise sari baten ek si
sare din hain ek se aur sari raten ek si
be natija be samar jang-o-jadal sud-o-ziyan
sari jiten ek jaisi sari maten ek si
sab mulaqaton ka maqsad karobar-e-zargari
sab ki dahshat ek jaisi sab ki ghaten ek si
ab kisi mein agle waqton ki wafa baqi nahin
sab qabile ek hain ab sari zaten ek si
ek hi rukh ki asiri khwab hai shahron ka ab
un ke matam ek se un ki baraten ek si
hun agar zer-e-zamin to faida hone ka kya
sang-o-gauhar ek hain phir sari dhaten ek si
ai munir azad ho is sehr yak rangi se to
ho gae sab zahr yaksan sab nabaten ek si