پھول تھے بادل بھی تھا اور وہ حسیں صورت بھی تھی

پھول تھے بادل بھی تھا اور وہ حسیں صورت بھی تھی

دل میں لیکن اور ہی اک شکل کی حسرت بھی تھی

جو ہوا میں گھر بنائے کاش کوئی دیکھتا

دشت میں رہتے تھے پر تعمیر کی عادت بھی تھی

کہہ گیا میں سامنے اس کے جو دل کا مدعا

کچھ تو موسم بھی عجب تھا کچھ مری ہمت بھی تھی

اجنبی شہروں میں رہتے عمر ساری کٹ گئی

گو ذرا سے فاصلے پر گھر کی ہر راحت بھی تھی

کیا قیامت ہے منیرؔ اب یاد بھی آتے نہیں

وہ پرانے آشنا جن سے ہمیں الفت بھی تھی

phul the badal bhi tha aur wo hasin surat bhi thi

dil mein lekin aur hi ik shakl ki hasrat bhi thi

jo hawa mein ghar banae kash koi dekhta

dasht mein rahte the par taamir ki adat bhi thi

kah gaya main samne us ke jo dil ka muddaa

kuchh to mausam bhi ajab tha kuchh miri himmat bhi thi

ajnabi shahron mein rahte umr sari kat gai

go zara se fasle par ghar ki har rahat bhi thi

kya qayamat hai munir ab yad bhi ate nahin

wo purane ashna jin se hamen ulfat bhi thi