اگا سبزہ در و دیوار پر آہستہ آہستہ

اگا سبزہ در و دیوار پر آہستہ آہستہ

ہوا خالی صداؤں سے نگر آہستہ آہستہ

گھرا بادل خموشی سے خزاں آثار باغوں پر

ہلے ٹھنڈی ہواؤں میں شجر آہستہ آہستہ

بہت ہی سست تھا منظر لہو کے رنگ لانے کا

نشاں آخر ہوا یہ سرخ تر آہستہ آہستہ

چمک زر کی اسے آخر مکان خاک میں لائی

بنایا سانپ نے جسموں میں گھر آہستہ آہستہ

مرے باہر فصیلیں تھیں غبار خاک و باراں کی

ملی مجھ کو ترے غم کی خبر آہستہ آہستہ

منیرؔ اس ملک پر آسیب کا سایہ ہے یا کیا ہے

کہ حرکت تیز تر ہے اور سفر آہستہ آہستہ

uga sabza dar-o-diwar par ahista ahista

hawa khali sadaon se nagar ahista ahista

ghira badal khamoshi se khizan asar baghon par

hile thandi hawaon mein shajar ahista ahista

bahut hi sust tha manzar lahu ke rang lane ka

nishan akhir hua ye surkh tar ahista ahista

chamak zar ki use akhir makan-e-khak mein lai

banaya sanp ne jismon mein ghar ahista ahista

mire bahar fasilen thin ghubar-e-khak-o-baran ki

mili mujh ko tire gham ki khabar ahista ahista

munir is mulk par aseb ka saya hai ya kya hai

ke harkat tez tar hai aur safar ahista ahista