Arooz is now on the App Store, for iPhone and iPad. Download →

All poetry

سفر میں ہے جو ازل سے یہ وہ بلا ہی نہ ہو

Munir Niazi (1928–2006)

سفر میں ہے جو ازل سے یہ وہ بلا ہی نہ ہو

کواڑ کھول کے دیکھو کہیں ہوا ہی نہ ہو

نگاہ آئینہ معلوم عکس نامعلوم

دکھائی دیتا ہے جو اصل میں چھپا ہی نہ ہو

زمیں کے گرد بھی پانی زمیں کی تہہ میں بھی

یہ شہر جم کے کھڑا ہے جو تیرتا ہی نہ ہو

نہ جا کہ اس سے پرے دشت مرگ ہو شاید

پلٹنا چاہیں وہاں سے تو راستہ ہی نہ ہو

میں اس خیال سے جاتا نہیں وطن کی طرف

کہ مجھ کو دیکھ کے اس بت کا جی برا ہی نہ ہو

کٹی ہے جس کے خیالوں میں عمر اپنی منیرؔ

مزا تو جب ہے کہ اس شوخ کو پتا ہی نہ ہو