محفل آرا تھے مگر پھر کم نما ہوتے گئے

محفل آرا تھے مگر پھر کم نما ہوتے گئے

دیکھتے ہی دیکھتے ہم کیا سے کیا ہوتے گئے

نا شناسی دہر کی تنہا ہمیں کرتی گئی

ہوتے ہوتے ہم زمانے سے جدا ہوتے گئے

منتظر جیسے تھے در شہر فراق آثار کے

اک ذرا دستک ہوئی در دم میں وا ہوتے گئے

حرف پردہ پوش تھے اظہار دل کے باب میں

حرف جتنے شہر میں تھے حرف لا ہوتے گئے

وقت کس تیزی سے گزرا روزمرہ میں منیرؔ

آج کل ہوتا گیا اور دن ہوا ہوتے گئے

mahfil ara the magar phir kam numa hote gae

dekhte hi dekhte ham kya se kya hote gae

na shanasi dahr ki tanha hamen karti gai

hote hote ham zamane se juda hote gae

muntazir jaise the dar shahr-e-firaq asar ke

ik zara dastak hui dar dam mein wa hote gae

harf parda posh the izhar dil ke bab mein

harf jitne shahr mein the harf-e-la hote gae

waqt kis tezi se guzra rozmarra mein munir

aj kal hota gaya aur din hua hote gae