اس شہر سنگ دل کو جلا دینا چاہئے

اس شہر سنگ دل کو جلا دینا چاہئے

پھر اس کی خاک کو بھی اڑا دینا چاہئے

ملتی نہیں پناہ ہمیں جس زمین پر

اک حشر اس زمیں پہ اٹھا دینا چاہئے

حد سے گزر گئی ہے یہاں رسم قاہری

اس دہر کو اب اس کی سزا دینا چاہئے

اک تیز رعد جیسی صدا ہر مکان میں

لوگوں کو ان کے گھر میں ڈرا دینا چاہئے

گم ہو چلے ہو تم تو بہت خود میں اے منیرؔ

دنیا کو کچھ تو اپنا پتہ دینا چاہئے

is shahr-e-sang dil ko jala dena chahiye

phir us ki khak ko bhi ura dena chahiye

milti nahin panah hamen jis zamin par

ik hashr is zamin pe utha dena chahiye

had se guzar gai hai yahan rasm-e-qahiri

is dahr ko ab us ki saza dena chahiye

ik tez raad jaisi sada har makan mein

logon ko un ke ghar mein dara dena chahiye

gum ho chale ho tum to bahut khud mein ai munir

duniya ko kuchh to apna pata dena chahiye