چمن میں رنگ بہار اترا تو میں نے دیکھا

چمن میں رنگ بہار اترا تو میں نے دیکھا

نظر سے دل کا غبار اترا تو میں نے دیکھا

میں نیم شب آسماں کی وسعت کو دیکھتا تھا

زمیں پہ وہ حسن زار اترا تو میں نے دیکھا

گلی کے باہر تمام منظر بدل گئے تھے

جو سایۂ کوئے یار اترا تو میں نے دیکھا

خمار مے میں وہ چہرہ کچھ اور لگ رہا تھا

دم سحر جب خمار اترا تو میں نے دیکھا

اک اور دریا کا سامنا تھا منیرؔ مجھ کو

میں ایک دریا کے پار اترا تو میں نے دیکھا

chaman mein rang-e-bahar utra to main ne dekha

nazar se dil ka ghubar utra to main ne dekha

main nim shab asman ki wusat ko dekhta tha

zamin pe wo husn zar utra to main ne dekha

gali ke bahar tamam manzar badal gae the

jo saya-e-ku-e-yar utra to main ne dekha

khumar-e-mai mein wo chehra kuchh aur lag raha tha

dam-e-sahar jab khumar utra to main ne dekha

ik aur dariya ka samna tha munir mujh ko

main ek dariya ke par utra to main ne dekha