جو مجھے بھلا دیں گے میں انہیں بھلا دوں گا

جو مجھے بھلا دیں گے میں انہیں بھلا دوں گا

سب غرور ان کا میں خاک میں ملا دوں گا

دیکھتا ہوں سب شکلیں سن رہا ہوں سب باتیں

سب حساب ان کا میں ایک دن چکا دوں گا

روشنی دکھا دوں گا ان اندھیر نگروں میں

اک ہوا ضیاؤں کی چار سو چلا دوں گا

بے مثال قریوں کے بے کنار باغوں کے

اپنے خواب لوگوں کے خواب میں دکھا دوں گا

میں منیرؔ جاؤں گا ایک دن اسے ملنے

اس کے در پہ جا کے میں ایک دن صدا دوں گا

jo mujhe bhula denge mein unhen bhula dunga

sab ghurur un ka main khak mein mila dunga

dekhta hun sab shaklen sun raha hun sab baten

sab hisab un ka main ek din chuka dunga

raushni dikha dunga un andher nagron mein

ik hua ziyaon ki char su chala dunga

be misal quriyon ke be kanar baghon ke

apne khwab logon ke khwab mein dikha dunga

main munir jaunga ek din use milne

us ke dar pe ja ke main ek din sada dunga