ہنستے ہوئے ماں باپ کی گالی نہیں کھاتے

ہنستے ہوئے ماں باپ کی گالی نہیں کھاتے

بچے ہیں تو کیوں شوق سے مٹی نہیں کھاتے

تم سے نہیں ملنے کا ارادہ تو ہے لیکن

تم سے نہ ملیں گے یہ قسم بھی نہیں کھاتے

سو جاتے ہیں فٹ پاتھ پہ اخبار بچھا کر

مزدور کبھی نیند کی گولی نہیں کھاتے

بچے بھی غریبی کو سمجھنے لگے شاید

اب جاگ بھی جاتے ہیں تو سحری نہیں کھاتے

دعوت تو بڑی چیز ہے ہم جیسے قلندر

ہر ایک کے پیسوں کی دوا بھی نہیں کھاتے

اللہ غریبوں کا مددگار ہے راناؔ

ہم لوگوں کے بچے کبھی سردی نہیں کھاتے

hanste hue man bap ki gali nahin khate

bachche hain to kyun shauq se mitti nahin khate

tum se nahin milne ka irada to hai lekin

tum se na milenge ye qasam bhi nahin khate

so jate hain fit path pe akhbar bichha kar

mazdur kabhi nind ki goli nahin khate

bachche bhi gharibi ko samajhne lage shayad

ab jag bhi jate hain to sahari nahin khate

daawat to bari chiz hai ham jaise qalandar

har ek ke paison ki dawa bhi nahin khate

allah gharibon ka madadgar hai rana

ham logon ke bachche kabhi sardi nahin khate