یہ بت جو ہم نے دوبارہ بنا کے رکھا ہے

یہ بت جو ہم نے دوبارہ بنا کے رکھا ہے

اسی نے ہم کو تماشا بنا کے رکھا ہے

وہ کس طرح ہمیں انعام سے نوازے گا

وہ جس نے ہاتھوں کو کاسہ بنا کے رکھا ہے

یہاں پہ کوئی بچانے تمہیں نہ آئے گا

سمندروں نے جزیرہ بنا کے رکھا ہے

تمام عمر کا حاصل ہے یہ ہنر میرا

کہ میں نے شیشے کو ہیرا بنا کے رکھا ہے

کسے کسے ابھی سجدہ گزار ہونا ہے

امیر شہر نے کھاتا بنا کے رکھا ہے

میں بچ گیا تو یقیناً یہ معجزہ ہوگا

سبھی نے مجھ کو نشانہ بنا کے رکھا ہے

کوئی بتا دے یہ سورج کو جا کے ہم نے بھی

شجر کو دھوپ میں چھاتا بنا کے رکھا ہے

ye but jo ham ne dobara bana ke rakha hai

usi ne ham ko tamasha bana ke rakha hai

wo kis tarah hamen inam se nawazega

wo jis ne hathon ko kasa bana ke rakha hai

yahan pe koi bachane tumhen na aega

samundaron ne jazira bana ke rakha hai

tamam umr ka hasil hai ye hunar mera

ke main ne shishe ko hira bana ke rakha hai

kise kise abhi sajda guzar hona hai

amir-e-shahr ne khata bana ke rakha hai

main bach gaya to yaqinan ye mojiza hoga

sabhi ne mujh ko nishana bana ke rakha hai

koi bata de ye suraj ko ja ke ham ne bhi

shajar ko dhup mein chhata bana ke rakha hai