یہ ہجر کا رستہ ہے ڈھلانیں نہیں ہوتیں

یہ ہجر کا رستہ ہے ڈھلانیں نہیں ہوتیں

صحرا میں چراغوں کی دکانیں نہیں ہوتیں

خوشبو کا یہ جھونکا ابھی آیا ہے ادھر سے

کس نے کہا صحرا میں اذانیں نہیں ہوتیں

کیا مرتے ہوئے لوگ یہ انسان نہیں ہیں

کیا ہنستے ہوئے پھولوں میں جانیں نہیں ہوتیں

اب کوئی غزل چہرہ دکھائی نہیں دیتا

اب شہر میں ابرو کی کمانیں نہیں ہوتیں

ان پر کسی موسم کا اثر کیوں نہیں ہوتا

رد کیوں تری یادوں کی اڑانیں نہیں ہوتیں

یہ شیر ہے چھپ کر کبھی حملہ نہیں کرتا

میدانی علاقوں میں مچانیں نہیں ہوتیں

کچھ بات تھی جو لب نہیں کھلتے تھے ہمارے

تم سمجھے تھے گونگوں کے زبانیں نہیں ہوتیں

ye hijr ka rasta hai dhalanen nahin hotin

sahra mein charaghon ki dukanen nahin hotin

khushbu ka ye jhonka abhi aya hai idhar se

kis ne kaha sahra mein azanen nahin hotin

kya marte hue log ye insan nahin hain

kya hanste hue phulon mein janen nahin hotin

ab koi ghazal chehra dikhai nahin deta

ab shahr mein abru ki kamanen nahin hotin

un par kisi mausam ka asar kyun nahin hota

rad kyun tiri yadon ki uranen nahin hotin

ye sher hai chhup kar kabhi hamla nahin karta

maidani ilaqon mein machanen nahin hotin

kuchh bat thi jo lab nahin khulte the hamare

tum samjhe the gongon ke zabanen nahin hotin