کالے کپڑے نہیں پہنے ہیں تو اتنا کر لے

کالے کپڑے نہیں پہنے ہیں تو اتنا کر لے

اک ذرا دیر کو کمرے میں اندھیرا کر لے

اب مجھے پار اتر جانے دے ایسا کر لے

ورنہ جو آئے سمجھ میں تری دریا کر لے

خودبخود راستہ دے دے گا یہ طوفان مجھے

تجھ کو پانے کا اگر دل یہ ارادہ کر لے

آج کا کام تجھے آج ہی کرنا ہوگا

کل جو کرنا ہے تو پھر آج تقاضا کر لے

اب بڑے لوگوں سے اچھائی کی امید نہ کر

کیسے ممکن ہے کریلا کوئی میٹھا کر لے

گر کبھی رونا ہی پڑ جائے تو اتنا رونا

آ کے برسات ترے سامنے توبہ کر لے

مدتوں بعد وہ آئے گا ہمارے گھر میں

پھر سے اے دل کسی امید کو زندہ کر لے

ہم سفر لیلیٰ بھی ہوگی میں تبھی جاؤں گا

مجھ پہ جتنے بھی ستم کرنے ہوں صحرا کر لے

kale kapre nahin pahne hain to itna kar le

ik zara der ko kamre mein andhera kar le

ab mujhe par utar jane de aisa kar le

warna jo ae samajh mein tiri dariya kar le

khudbakhud rasta de dega ye tufan mujhe

tujh ko pane ka agar dil ye irada kar le

aj ka kam tujhe aj hi karna hoga

kal jo karna hai to phir aj taqaza kar le

ab bare logon se achchhai ki ummid na kar

kaise mumkin hai karela koi mitha kar le

gar kabhi rona hi par jae to itna rona

a ke barsat tire samne tauba kar le

muddaton baad wo aega hamare ghar mein

phir se ai dil kisi ummid ko zinda kar le

ham safar laila bhi hogi mein tabhi jaunga

mujh pe jitne bhi sitam karne hun sahra kar le